Ballun Politiku
Nhar l-Erbgħa l-Partit Nazzjonalista għazel it-titlu “L-immigrazzjoni – ballun politiku tal-Partit Laburista”, fl-aħħar dibattitu politiku imtella’ mill-Awtorirità tax-Xandir. Għal Partit Nazzjonalista ħadu sehem il-Ministru Carm Mifsud Bonnici u l-Ewroparlamentari Nazzjonalista David Casa.
L-għażla tas-suġġett kien magħżul biex jaljena lill-Maltin u lill-Għawdxin mill-problema nnifisha ta’ l-immigrazzjoni. Qisu l-Partit Laburista qiegħed jallarma n-nies għalxejn bi skopijiet politiċi. Din hija t-tattika tipika Nazzjonalista. Minflok jiffukaw fuq il-problema vera, jdawru l-argument li l-Laburisti qegħdin jieħdu vantaġġ minn din il-problema. Xejn m’hu aktar ‘il bogħod mill-verità. Il-Partit Laburista ilu zmien twil ma jużax il-kwistjoni ta’ l-immigrazzjoni llegali għal skop politiku. Fil-fatt jien kont għidt li kieku fl-aħħar elezzjoni użajna n-nuqqasijiet kbar f’dan il-qasam ta’ l-immigrazzjoni min-naħa tal-Gvern Nazzjonalista, konna nirbħu l-Elezzjoni Ġenerali. Ħriġna ta’ rgiel. U minflok jgħajruna li qed nieħdu vantaġġ politiku. Ir-realtà hija li n-Nazzjonalisti qed idawru din il-kwistjoni f’waħda politika biex jattakkaw lill-Partit Laburista u lill-kandidati għall-Elezzjonijiet tal-Parlament Ewropew, peress li huwa ċar li l-poplu tilef il-fiduċja f’dan il-gvern.
Stħarriġ li sar riċentement wera illi l-aktar affarijiet li qed jinkwetaw lill-poplu Malti u Għawdxi huma l-għoli tal-ħajja, x-xogħol u l-immigrazzjoni llegali.
Il-gvern irid iġib lill-Partit Laburista f’pożizzjoni li kull darba li jsemmi kwistjonijiet nazzjonali, l-Oppożizzjoni tiġi akkużata li qed tagħmel hekk għal skopijiet politiċi. Ġejna f’pożizzjoni fejn il-Gvern Nazzjonalista ma jiflaħx għall-kritika u minflok jagħmel minn kollox biex isib soluzzjoni għall-problema, jinfexx f’attakk sfrenat fuq il-kandidati għall-Elezzjonijiet tal-Parlament Ewropew u fuq il-Partit Laburista.
Kull ħaġa li jsemmi l-Partit Laburista li hu ta’ mportanza nazzjonali, l-gvern minflok jipprova jsolvi dawn il-problemi, qiegħed jaqbdu paniku u jipprova jaħbihom bħal trab taħt it-tapit.
Ħadd ma jista’ jinnega illi l-familji Maltin u Għawdxin ma jistgħux ilaħħqu mal-ħajja minħabba l-kontijiet, fosthom dawk tad-dawl u l-ilma, tal-liċenzji tal-karozzi, taxxi indiretti bħal l-ispeed “cameras” u oħrajn. Jekk l-oppożizzjoni tiftaħ ħalqha, tiġi akkużata illi qiegħda tgħawweġ il-fatti, qisu l-poplu daqs tant iblah li ma jafx li ma jistax ikampa. L-istess dwar ix-xogħol. Jippruvaw idaħħlu fil-moħħ ta’ l-elettorat li dan il-gvern qiegħed kontinwament joħloq ix-xogħol u l-impjiegi. Saħansitra jtellgħu billboards bin-mumru maġiku ta’ 7,000.
Iżda ħaġa ta’ l-iskantament huwa, li meta rajt in-nies fl-uffiċċju tiegħi nhar il-Ġimgħa li għaddietm bqajt sas-siegħa ta’ filgħodu nara n-nies u minn kull ħamsa, tlieta kienu qed ifittxu x-xogħol.
Għalija u għal min hu bla xogħol l-istatistika hija ħrafa. Għaliex jekk verament hawn dan ix-xogħol kollu nixtieq inkun naf kif hawn eluf ifittxu fejn jaħdmu. Nixtieq inkun naf kif il-qagħad qiegħed dejjem jogħla.
Imma jekk aħna nitkellmu dwar dawn il-kriżijiet nazzjonali, niġu akkużati illi qed nilgħabu bil-blalen politiċi. Sfortunatament għan-Nazzjonalisti, l-Partit Laburista qatt mhu se jaċċetta sarima ma’ ħalqu.
