Illum ta’ spiss nisimgħu illi t-turisti f’pajjiżna qegħdin dejjem jiżdiedu u jitkattru, partikolarment f’dawn iż-żminijiet tas-sena. U Alla ħares ma jkunx hekk għax kieku s-settur turistiku, li minnu jiddependu eluf kbar ta’ familji, jfalli kompletament. Iżda ħadd ukoll m’għandu jinsa illi kieku ma kienetx għall-kumpanija Airmalta, kieku dan is-settur ma kienx jibda jeżisti!

Ta’ min ifakkar ukoll li l-Airmalta li llum qed iġġib eluf kbar ta’ turisti fis-sena, kienet twaqqfet bl-inizjattiva tal-Partit Laburista, fl-ewwel leġislatura tiegħu wara l-Indipendenza. Dak iż-żmien, taħt it-tmexxija tal-Prim Ministru Dom Mintoff, kienu nkrew l-ewwel ajruplani mill-Pakistan. Dan kien sar possibbli minħabba l-ħbiberija li kienet teżisti bejn Dom Mintoff u l-President Bhutto. Bla dubju ta’ xejn dan iwassalni biex insostni dak li dejjem emmint fih – jiġifieri l-ħtieġa ta’ kuntatt personali fl-isfera internazzjonali.

Meta wieħed iħares lejn l-istorja ndustrijali ta’ pajjiżna jara li t-tradizzjoni marittima f’dak li għandu x’jaqsam ma’ bini ta’ vapuri, tmjur lura għaż-żminijiet tal-Kavallieri. B’danakollu kien sewwasew fi żmien l-Ingliżi illi din l-industrija ngħatat spinta qawwija f’pajjiżna.

Il-qasam marittimu kien jingħata mportanza kbira mill-Ingliżi tant illi dawn kienu jieħdu ħsieb il-ħtiġijiet kollha tal-flotta Ingliża fil-Mediterran. Wieħed, hawn ta’ min isemmi illi l-flotta Ingliża tal-Mediterran kienet ferm akbar mill-flotta Ingliża fl-Ingilterra.

F’pajjiżna, t-Tarzna ta’ Malta ħadet sehem kbir u ferm mportanti f’dak li hu żvilupp industrijali, billi pproduċiet u għaġnet l-għarfien u t-tagħlim ta’ bosta ħaddiema, tista’ tgħid f’kull sengħa f’din l-industrija. Bla tlaqlieq ngħid illi dawn il-ħaddiema professjonali jħabbtuha ma’ bosta ħaddiema oħrajn fl-istess qasam madwar id-dinja.